مضايقات الشباب للنساء في الاسواق الشعبية!!!!

السلام عليكم .....كلنة رايحين للأسواق الشعبية و شايفين فد شغلة تضوج و تضايق الناس خصوصاً فئة النساء هسة عرفتوا شنو موضوعنا اليوم اني راح اكلكم انتشار الشباب بالأسواق الشعبية بكل سوك شعبي تشوف زمرة مال شباب متجمعين براس كل فرع و يباوعون عالرايح و الجاي و خصوصاً النساء و تشوف أشكالهم غريبة فد كيلوا جل مال شعر و دهن (بس يتعرض للشمس يصير بيض سلك )و الوجهة ما شاء الله يخبل و الحواجب مطبورة هم ما ادري شيحسون يمكن عبالهم من تشوفهم البنات بهاي الحالة الحرجة راح تكول لأمها اوكفي هو هذا فارس احلامي اوكفي ما أتحرك منا الا تزوجوني اله لا حقيقة انت شنو الي تريدة من هاي الوكفة اللا اخلاقية منها و بعد فترات تطورت الوكفة و صارت بنص الشارع مال السوك يعني مضايقة للماشين عيني عينك و ترة مو بس يضايقون النساء حتى الشباب و عدهم استعداد يحجون حتى على الشباب !!!
الي احب اكولة يا صديقي انت شاب و ياريت تستغل هاي المرحلة و تسوي شي يفيدك و ينفع الناس و اذا ما عندك شي ينفعك او ينفع الناس لتضر الناس و هذا مكان عام ميصير تجي و تضايق اليمشون لان الي ديمشي مو غريب بالعكس هم جيرانك و اهلك و اهل صديقك أنت تقبل احد يضايق اهلك من يمشون اكيد مراح تقبل الي متقبلة على نفسك ليش تقبلة للناس ؟؟ و خلي أذكرك بكلام الرسول صل الله عليه و سلم ((قال رسول الله : { إياكم والجلوس على الطرقات }. فقالوا: ما لنا بد إنما هي مجالسنا نتحدث فيها. قال: { فإذا أبيتم إلا المجالس فأعطوا الطريق حقه }. قالوا: وما حق الطريق؟ قال: { غض البصر، وكف الأذى، ورد السلام، وأمر بالمعروف، ونهي عن المنكر } [رواه البخاري].

أودعناكم اغــــــــــاتي